شعـــر
عبد الحسـين خلف الدعمي
يــارســـول الله .. دخيــلك
يارســول الله تـرانه بعد عينـك ماصفينــه
اصواب غدرأهـل السقيفه لسـه منه ما صحينه
يارســول الله انذبحنـه
ألف مـره واحنه أحنـه
بعـد نكبر لنـه صحنـه
هــله هــله .. هــله هــله
احســين وينـه احســين وينـه
*** ***
سـيدي دينك الواحد أصــبح أحزاب اومذاهب
واحـد ايكفر الثاني ، اوثالث ارهابي اومشاغب
هـاي علتنـه العلينـه سلطت سـيف الأجانب
سبب كـل هــذا التردي يبو القاسم من ادينـه
يارســول الله دخيلك دارت الرحــى علينـه
*** ***
جيب ليـــل اخـذ عتابه كلنه من باجرنخاف
والحجي ، رد الحجي المايعجب البـاشا انحراف
راح واحـد اجـو ميـه بـس شعارات اوهتاف
ضعنه لنـه ورا الدرهم ويـن مايمشي مشـينه
يارســول الله دخيلك دارت الرحــى علينـه
*** ***
يانبـي الأسـلام دينـك متـهم دينــك خطـر
بأجتثــاثه من الوجــود اليوم ماسون الأمـر
وألف قائـد قاضي مفتـي يندعي بيـها ظهـر
لابـس انطاقيـن لكـن جاي متحـزم علينــه
يارســول الله دخيلك دارت الرحــى علينـه
*** ***
خدرونه ابحجي امعسـل وأخلفـو كـل الوعود
خطـطو بســم السلام يمسحونه من الوجـود
اجـو جابومن اويـاهـم فكـو المـن هالحدود
بصـر عندك اوبصيـره اتفكر المـن كاصدينـه
يارســول الله دخيلك دارت الرحــى علينـه
*** ***
واحـد ايشــتم الثـاني بالطـلايب ملتهيــن
هــذا أســود ذاك أبيض راح تطوينه السنين
من يصحينــه بعدنه اهـواي عن منهج الدين
عن حبيب الله اوآلـه الهالسبب أحنه انولينــه
يارســول الله دخيلك دارت الرحــى علينـه
*** ***
الدرب للفـردوس واضح عمت عينه المايشوف
كربـله جامعه كبـرى اقـره بكتــاب الطفوف
تـلكــه كلشي الي تريده وجنـك ابمكه تطوف
اليـزور حسـين زار العشره ولــده والمدينه
يارســول الله دخيلك دارت الرحــى علينـه
*** ***
الدنيــه ماتخلـد الواحد ماعـرف دينه وسيله
للخـلاص من الهموم الغافيـه ابحضن الرذيلـه
الدنيــه باب الجنه هيـه للعرف درب الفضيله
وابتـعد عن النميمه اوصـان ذمته أوحفظ دينه
يارســول الله دخيلك دارت الرحــى علينـه
يارســول الله دخيلك
دارت الرحــى علينـه
